男網天王拿度入場睇巴黎聖日耳門主場對蘭斯賽事，賽前獲聖日耳門王牌前鋒伊巴謙莫域贈送波衫，兩大體壇巨星惺惺相惜，主隊憑射手加美路喺65分鐘一箭定江山贏波，總算冇令拿度失望而回。講開伊巴謙莫域，佢嘅招牌蠍子式射門名震天下，英超奀星保斯都學到嘢喎，呢個韋根守將作客史雲斯時使出呢招建功，絕對係英超本周足金金球，可惜球隊最終仍輸1比2。