美國「水怪」菲比斯最近喺一本美國雜誌當選為「最健康男人」，呢個選舉範圍相當廣泛，退役多年嘅「籃球之神」米高佐敦、奧運田徑名宿劉易斯、動作影星阿諾舒華辛力加，連已故影星李小龍都有份「參選」，結果卻係菲比斯「最健康」。
陳啟泰話過「知識就是財富」，西方諺語原句係「健康就是財富」，其實好多中國人過年過節拜年時，人人劈頭第一句「恭喜發財」，第二句就多數係「身體健康」嘞。好多人對於「健康」嘅概念，都係單純地指「身體」有冇問題，「副偈」掂唔掂。不過如果層次高一啲，就可以指「形象」健康，又或者「思想」健唔健康呢類較為抽象嘅意念。
作為體壇巨星，身體健康同「BB有便便」一樣都係最基本嘅事，菲比斯喺三屆奧運會累積攞咗十八個金牌，仲破咗咁多世界紀錄，佢點會係「病壞」呀！但今次選佢為「最健康」嘅男人，卻似乎有所爭議，因為「水怪」個底都幾花，就係佢曾經吸毒。
菲比斯身體當然健康，但佢形象係咪咁健康就兩睇，思想健唔健康就更加無法量度。該雜誌選菲比斯為最健康男人，睇嚟都係純粹指最低層次嘅身體方面，或者佢哋覺得，要選出一個由身體至心靈各方面都最健康嘅男人，暫時未搵到，所以要選個最接近嘅人出嚟，處女座黃金聖鬥士沙加係「最接近神的男人」，而菲比斯就係「最接近健康的男人」嘞！