港人愛名牌，港足未有資格請費格遜或莫連奴執教，即使早幾年曾經吹過會嚟嘅史高拉利最後亦唔「騷」你，攞咗兩屆澳職最佳教練嘅摩力克睇嚟係各方面均可接受之最佳選擇，然而摩帥近期卻橫遭球圈有勢力人士輪流喪插，波總已經走咗一個ＣＥＯ，莫非下一個輪到摩帥？
摩力克與球圈勢力人士矛盾嘅根源，基本上全世界都有，就係香港足球發展走向；究竟應該朝着「港隊本位」出發，還是「球會本位」邁進？摩帥來港任務就係提升香港隊水平，當然以港隊行先，但班主及球員就唔係咁想。
歷史不斷重覆，前任港足教頭曾偉忠提倡「港隊長期集訓」安排，結果有球員只係象徵式出席，只係報到而唔操。摩帥則說得很白，佢好直接咁話：「德國隊唔使長期集訓，因為德甲水準高，教練喺聯賽隨便揀人就係世界級勁旅，不過香港隊唔係囉！」
政府揼水搞「鳳凰計劃」，各方勢力爭搶資源，就像內地廟宇嘅錦鯉魚池，買一包魚糧，隨手撒一把，魚群嘩啦嘩啦地搶食。究竟邊個爭到最多？當然係最有勢力、最大條搶上水面嘅魚食得最多。
香港足球史上首位ＣＥＯ麥國棟，當初波總秘書處為佢改中文名「國棟」，原是寄望佢成為本地波棟樑，完成各項改革，不過呢條「棟樑」上任僅半年便因「思鄉情切」請辭，有指整件事由獵頭至賠償埋單共花去公帑達到「兩球」。然而「思鄉」呢個理由，只要稍有常識都知道只係行走江湖嘅虛話伎倆，難道佢會喺辭職信上寫明：「你班友仔都唔係波嘅，我劈炮唔撈喇！」
炒一個ＣＥＯ唔見「兩球」，如果再踢走一個教練，又唔知唔見幾多球，就好似當年屯門普高天德哥大叫「幾多球呀，出聲吖！」一樣，到時驚動到班議員同審計，政府一旦拔喉，咁就大家冇癮啦！