中國賽Round 2今午勢演入樽騷！熱火及快艇兩支NBA勁旅轉戰上海再決高下，「入樽王」格芬賽前揚言會瘋狂「爆Dunk」冧中國fans，而「閃電俠」韋迪則希望為北京站瘀爆炒樽一幕補鑊，加上「CP3」基斯保羅傷愈復出及姚明任特別嘉賓，今日賽事肯定比北京站更有睇頭！
（now635、中央5台及廣東體育今午12時30分直播）
雙方上周四晚於北京開戰，結果快艇以14分之差慘敗，全場共有25次失誤，教練迪尼高昨日在上海東方體育中心進行針對性訓練，並制訂了一套新戰術與熱火抗衡。而因手指受傷休養兩個月的基斯保羅，昨日親口透露會披甲上陣：「我都唔知會打幾耐，可能10分鐘，一切由教練話事，其實除咗坐冷板，我乜都願意做！」首戰攻入全隊最高19分的格芬，則表示有「CP3」回歸可助他專心一意「鋤散」熱火內線，更承諾會為上海球迷奉獻一連串勁爆入樽。
因航班延誤要取消原定觀光計劃的熱火，難得來華當然要玩到盡。一眾球員前晚殺落上海外灘花馬天堂開Party，當中以型爆西裝Look登場的韋迪最受現場索爆Model歡迎。「閃電俠」於北京站僅攻入5分，一次入樽炒粉更令他「冇晒飛士」。不過，韋迪昨日出席個人自傳簽名會時就拍心口承諾，今仗會表演精彩入樽補數，各位fans記住(目及)實啦！
講完韋迪又點少得「大帝」勒邦占士，不過就唔係咁好嘅消息。「大帝」經理人兼老友列治保羅，今年選秀前夕涉嫌非法聯絡德州大學後衞卡邦高，並向該位二年級生提供車馬費及訓練費用，如今正受到NCAA調查。根據規例，經理人只可與球員家屬聯絡，更不能有任何金錢瓜葛，列治保羅今次涉嫌賄賂大學球員，隨時會被釘牌。
本報綜合報道