大帝鍊腳起雙飛

熱火中國之旅行程緊密，抵達北京後參觀過頤和園同萬里長城，行到攰梗係要鬆一鬆，大佬占士前晚就帶埋隊友夏士林同新援劉易斯夜踩按摩店玩腳底按摩。唔知「大帝」係咪High得滯，猛影技師相然後放上Instagram，自己更加「起雙飛」搵兩個技師服侍佢，認真識歎！

想見姚明 讚麥基迪有鬥心

張相曝光後，引來內地網民頗大反應，有球迷留言：「韋迪呢？咁快就融入中國文化？」查實占士同「閃電俠」韋迪夜蒲早有前科，2008年「夢八」備戰京奧前夕，本報就影到佢兩個帶埋安東尼齊齊去澳門打令浴室消遣，仲揀出名服侍周到嘅越南妹按摩，已經第九次訪華嘅「大帝」熟晒路，今次中國行冇理由唔玩啫！

快艇主力格蘭希爾（左）同格芬漫步長城，猶如明星出巡。

快艇球員迪安迪佐敦（左）在北京操練時表現認真。（法新社圖片）

格芬買熊貓帽都講價

「閃電俠」尋日出席球隊操練時就搶住同傳媒講冇跟占士去按摩，跟住就轉移話題：「我膝傷已經好番，今仗會嘗試落場，打十分鐘都好。」至於一身鬆晒嘅占士亦心情大靚，尋日搵新兵雷阿倫鬥鍊三分，及後接受訪問亦無所不談，一時話想見姚明，一時就大讚已落實轉戰CBA嘅麥基迪有鬥心。

「熊貓」格芬，一味夠Fun。	格芬（右）買熊貓帽都講價，認真搞鬼。	熱火嘅夏士林（左二）同劉易斯（左一），大歎腳底按摩。
「大帝」上載鍊腳自拍照，見到要兩個技師服侍。

熱火喺中國賽嘅對手快艇，抵京後都有去遊長城，當中格芬就貫徹搞笑作風，幫襯小販買熊貓帽嘅時候仲係咁講價，認真婆仔！快艇同熱火將於今晚同周日喺北京及上海進行兩場中國賽，雖然快艇控衞基斯保羅好可能因傷缺席晒兩場賽事，但佢哋有格芬、奧當同格蘭希爾孭飛依然星味十足，對撼擁有占士、韋迪、保殊同雷阿倫四巨頭嘅NBA衞冕總冠軍熱火，堪稱史上最強嘅中國賽，難怪有消息話黃牛飛已炒至高出原價三倍，原價6,000元人民幣嘅VIP靚飛更加炒到過萬！

韋迪（左）已傷愈，在中國賽可同「大帝」拍住上。

放大圖片

（now 635今晚7時30分直播）