訪問當中，蘇媽媽多次強調蘇樺偉「呢個係乖仔」，自小謙虛，對人恭敬，母親節更是「偉仔」最重視的節日，蘇媽必定有禮物收。
「每年母親節隆重過我生日，佢一定同我食飯，佢知我好鍾意鄧麗君，有次買咗一套四隻嘅ＣＤ送畀我，細個時佢兩兄弟會做手工卡，長大就同我食飯飲茶，其實母親節係一個形式，孝順嘅話日日都係母親節啦。」蘇媽媽愈講愈心甜。
蘇媽媽補充「偉仔」自小已很懂事，知道家境清貧，很少扭買玩具：「細佬細個試過要買玩具，佢會話番細佬，有得玩咪得囉，佢好珍惜啲玩具，玩完就會執番好。」蘇媽媽更爆料「偉仔」年幼時最喜愛玩一個玩具鐘，拆完又再砌番好。
家住愛民邨的蘇樺偉，很多時都會同媽咪去大牌檔「撐枱腳」，但原來「偉仔」最愛吃媽媽炮製的黑椒牛扒，「蘇媽」自爆秘方：「我會買牛柳，可能係鎖水鎖得好，點樣鎖得好，哈！我自己都唔知，都係普通醃料嚟啫，再落些少黑椒，佢哋好鍾意食。」