蘇樺偉跑出不一樣人生
「跑步改變佢一生，亦改變咗我……當初已有心理準備照顧佢一生一世，意想不到係佢現在反過來能夠照顧我，係我最大嘅恩惠！」蘇媽媽露出一副幸福面容。在蘇媽媽眼中，兒子蘇樺偉一直沒有改變，同樣是自己的心肝寶貝，即使當年的「神奇小子」搖身一變為當今的「香港英雄」，逾20年間的「改變」的確很多，但不變的是他對跑步的熱誠，還有那「瞇瞇眼」的笑容！
參戰5屆殘奧、袋走5面殘奧金牌、掛上5個世界冠軍、坐擁11面殘奧獎牌……蘇樺偉的奮鬥故事，正正是一個偉大母親含辛茹苦養育一個殘障兒的辛酸經歷寫照，「佢13歲開始跑步，當時被人睇中（專業訓練），本想畀佢參加多一項活動，坦白講平日我只帶佢到公園玩，去去沙灘，參與跑步只想畀佢多啲見識，完全冇諗過能跑出成績。」蘇媽媽回顧囝囝的運動生涯津津樂道：「如果話跑步改變咗佢一生，我覺得最大改變應該係我，佢出世有病，我一直都擔心，每日生活愁悶，當時家庭經濟又唔好，樣樣都好辛苦，曾經想過死，但帶佢去跑步，睇見佢身體有進步，我都變得開心好多。」
痙攣無障礙 賺錢養家
天下父母對自己的孩子最基本要求，就是「開心成長，身體健康」，但因為蘇樺偉出生已患上黃疸病，導致腦部受損，引發肌肉張力及動作協調能力失常，簡單來說即是痙攣，對當時初為人母的蘇媽媽來說，實在是晴天霹靂，那時對自己親生骨肉一個最基本的願望──「健康成長」都未必達到，蘇媽媽憶述：「醫生當時叫我哋考慮清楚，要考慮一生一世照顧佢，最後想到佢始終係自己生，唔想因為怕日後辛苦而放棄佢……但想不到參加運動嘅效果會係出乎意料之外，依家我老嘞，反轉來佢能夠賺錢照顧我。」
為了配合今屆倫敦殘奧，方便訓練，「偉仔」放棄工作了七年的舊顧主，年初轉到香港傷殘人士體育協會工作，職務是活動助理，對工作新環境，「偉仔」說：「OK啦！」。當年的「神奇小子」已經三十而立，當初面對傳媒要靠媽媽做「翻譯」的「偉仔」，現在已可對答如流，不變的還是他「瞇瞇眼」的笑容，他在自傳中都有講過很喜歡笑，他相信笑容可為身邊人帶來歡樂，另一個原因就是年幼時因為身體痙攣加上先天弱聽影響說話，所以「笑」就是最佳的溝通方法。
不過，性格樂觀的媽媽也是他愛笑的動力，訪問當天發現蘇媽媽是個很風趣的人，為了讓攝影師影得「靚仔相」，不停地逗兒子笑：「喂，靚仔笑開心啲，唔係影唔靚冇飯食。」「偉仔」亦謂媽媽是最會逗他開心的人，他年幼時，媽不時做鬼臉，令「偉仔」發笑，蘇樺偉承認笑可以是一個很好的溝通橋樑：「我有時都會同隊友講講笑，咁樣氣氛會較好啲，有時同人相處都會容易啲。」
明31歲牛一 跑步不言退
明日31歲生辰的蘇樺偉在倫敦殘奧搏老命奪得一面銀牌，當全世界包括他媽媽都以為他賽後會退休，但凱旋回歸當天「偉仔」向傳媒說「唔退」，就連他媽媽都有點愕然：「我都奇怪，但由佢啦！呢個仔係個乖仔，既然佢喜歡，最重要係佢識得調節心態，我唔會叫佢停，亦唔會強迫佢，以後嘅路都係佢自己嘅。」
繼續獲得母親支持，在旁的蘇樺偉聽到也「笑瞇瞇」，再問他一次會否考慮退休，他斬釘截鐵的說：「唔退。」他解釋：「我很喜歡跑步，它令我身體強壯，我特別喜歡比賽氣氛，最鍾意就係比賽中段嘅過程，可以加速，嗰種感覺好似控制在我手。我知自己年紀差不多（退休），贏輸都會接受，很想去享受每場比賽。」
變了，真的變了！蘇樺偉不再是昔日輸了會「扁嘴」的男孩，而是一個思想成熟、懂得承擔的男生，這點蘇媽媽也從近兩屆殘奧察覺到兒子真的長大了：「佢心態已經不同，昇華咗好多，識得睇通睇透，知道自己呢個年紀得失已不重要，反而參加比賽係去學其他地方嘅文化，學習其他運動員，取長補短。」
既然是可承擔的男生，那何時成家立室呢？蘇樺偉又露出「瞇瞇笑」：「都會諗嘅，諗吓拍拖先啦。」蘇媽媽補充：「順其自然啦，我唔會催佢，係你就係你，不能強求。」
「醫生當時叫我哋考慮清楚，要考慮一生一世照顧佢，最後想到佢始終係自己生，唔想因為怕日後辛苦而放棄佢……但想不到參加運動嘅效果會係出乎意料之外，依家我老嘞，反轉來佢能夠賺錢照顧我。」
圖／文：徐飛、李芷韻