聯賽至今仍未開齋嘅利物浦，主場晏菲路球場最近有單頗特別嘅喜事，紅軍官網披露，接受來自美國一對女同性戀者請求，在晏菲路球場歷史性舉行同性戀婚禮，未知今次安排能否幫球隊沖喜！
好多球迷同球員都鍾意喺球場影婚紗照，甚至舉行婚禮，樂壇天王李克勤同太太盧淑儀嘅結婚相，就喺曼聯主場奧脫福球場取景，本地甲組球員蘇來強，更試過喺重建前嘅旺角場，仲要係一場甲組賽事嘅半場影結婚相。
素以製造「特別時刻」聞名嘅晏菲路球場， 理所當然成為廣大利迷嘅結婚熱點，球場本身早有婚禮套餐，一日一夜索價4,499鎊（約5.6萬港元）
一對新人莎拉麥禮與姬絲甸娜禾絲，兩人都係美國科羅拉多利物浦球迷會會員，今次帶同近50位親戚朋友去到晏菲路舉行婚禮，分別喺大門口、更衣室、球場草地影婚紗相，球場看台影大合照，場面熱鬧。
禾絲就話能夠在晏菲路行禮係一次奇妙經歷：「我哋事先商量過，究竟喺邊度舉行婚禮最好，結果一致決定去晏菲路。」莎拉追捧利物浦長達13年，佢話：「晏菲路係我經常去嘅地方，今次婚禮給我無限喜悅。」
對於舉辦首個同性戀婚禮，利物浦社會融入部負責人懷斯表示：「今次利物浦向前邁出一大步，我們一直為社會融入與多元化工作感到驕傲，能夠首次為這對可愛嘅女性舉辦同性戀婚禮，呢種感覺異常美妙。」