劉翔怕瘀返上海避世

康復期減短至半年

「翔飛人」當住數十億觀眾面前仆倒傷退，呢位國寶級運動員覺得好冇「飛士」，「翔爸」笑笑口爆阿仔返祖家會靜心休養，話阿翔應該唔返屋企喇，怕瘀啊！一陣啲親戚朋友嚟齊好尷尬，去莘庄好過啦！另外，記者冬日娜同劉翔friend底，透露「翔飛人」可以用拐杖行幾步，預算康復期可減短到五至六個月。

買保險袋番6000人民幣

國內傳媒透露劉翔手術及賠償事宜，「翔飛人」於倫敦富貴醫院做手術，埋單條數肯定唔小嘢，但奧運主辦單位有幫運動員買保險，手術費會由保險公司孭晒。另外，國家體育總局亦有為運動員買「燕梳」，按傷情分十二級，劉翔被評為第十級，一般選手獲賠3,000元人民幣，「翔哥」貴為世界冠軍有雙倍賠償，但都係得6,000蚊人民幣落袋。