全球媒體都集中喺菲比斯獲得幾多面獎牌，和踏上衞冕之路嘅保特身上。當然，金牌係媒體嘅追訪話題，但自現代奧運揭幕以來，有好多國家甚至仍未贏過一面獎牌。觀眾們唔應該忽視弱勢國家選手想打破奧運歷史而付出嘅努力，關島柔道「巨漢」列卡度巴拉斯就係其中一位！
當列卡度巴拉斯日前登上倫奧柔道賽場時，無論現場觀眾同佢對手都嚇到呆咗，因為佢體重竟高達218公斤（約480磅），好似一個重量級相撲手咁。更有報道指，佢嘅體重重過日本女子體操隊全部5位成員嘅總和（190公斤），認真誇張。
所謂唔打得都嚇得，當佢喺第1圈出戰時，對手唔知係咪畀佢嘅台型嚇窒，唔使3分鐘已被「KO」，令佢為關島贏得柔道奧運史上首場勝利。不過，列卡度巴拉斯始終經驗尚淺，最終僅能到此一「柔」，去到第2圈就即被對手擊敗，行人止步。
事實上，列卡度巴拉斯出生於柔道世家，爸爸曾代表關島出戰1988年奧運。列卡度巴拉斯從小就迷上柔道，每日訓練4至6粒鐘，更到過日本深造，08京奧開幕禮進場儀式，佢更加成為關島嘅持旗手添！對於今次次圈出局，佢話：「我嘅奧運雖到此為止，但我以後一定會做得更好，依家我就要開始刻苦訓練，希望下屆可以捲土重來。」關島只係一個小國，但「小國家有大志向」，祝佢哋喺追逐夢想嘅路上好運啦！