奧運舉行得如火如荼，但倫敦竟然鬧遊客荒，生意低迷近乎「鬼城」！面對呢個情況，連英國首相卡梅倫都開口希望遊客去倫敦購物，但要改善就梗係要搵高人出手。邊個係高人？梗係碧咸啦！英國著名品牌H&M諗到將碧咸着底褲嘅廣告投射喺多佛爾港著名景點白色峭壁嘅上面，據聞呢個廣告大到連對岸法國都可以睇到，自然吸引唔少遊客去參觀，順路自然會去埋倫敦，自然能帶動倫敦經濟，果然掂呀！
倫敦奧運前，政府預計遊客會絡繹不絕，令交通造成壓力。點知傳統景點同消費點都出現遊客荒，因非奧運遊客同一眾倫敦上班族都走晒去外國度假，搞到倫敦人流疏落，生意慘淡。
英國首相卡梅倫都有點心慌，開腔呼籲國民去倫敦購物：「奧運前人人都話倫敦會好擠迫，呢啲都係錯誤。倫敦交通非常正常，大家返嚟購物同食嘢啦！」其實要解決呢個情況，必定要搵名人幫手，邊個可以咁有power？梗係碧咸啦！
咁啱呢個時候，英國著名品牌H&M有新搞作，佢哋睇中咗多佛爾港嘅著名景點白色峭壁，諗到將碧咸着底褲嘅廣告投射喺上面，個影像大到連對岸法國都可以睇到，認真誇張。相信呢個巨大影像會吸引唔少人去觀賞，遊客順路自然會去埋倫敦，咁又可以令倫敦熱鬧番，認真好橋。
講開碧咸，佢老婆維多利亞都有搞作，之前有傳拆夥多年嘅辣妹組合將於倫敦奧運閉幕式表演，近日維多利亞喺twitter上載咗一張「鑽石mic」嘅照片，似乎暗示自己正在進行閉幕式綵排工作。此外，維多利亞喺訪問被問到生小孩嘅問題時，強調自己從來冇講過唔會再懷孕，仲話自己同老公碧咸對呢個問題持開放態度，話唔定佢兩公婆今年就生番個ＢＢ紀念英國奧運都未定！