日本計錯數8強撼巴西
奧運女足分組賽尾輪，最威係美國女足，她們以1比0小勝北韓女足，三戰全捷昂首殺入8強，將會面對實力麻麻的新西蘭。至於世盃冠軍日本女足原本諗住走線有利備戰八強賽，殘陣下悶和弱旅南非0比0以次名出線，點知計錯數搞到要在八強硬撼巴西，認真濕滯。
今屆奧運志切奪金的美國女足，憑老將中鋒雲芭芝上半場一錘定音，以1比0擊敗頑強的北韓女足，呢個係雲芭芝代表國家185仗的第141個士哥，三戰全勝，美國演出實在超班，該隊在8強只係對住剛贏喀麥隆3比1、僅以得失球差壓倒北韓取得小組最佳第三名之一的新西蘭女足，闖入4強機會高唱入雲。
至於世盃盟主日本女足，守將岩清水梓賽後爆出主帥想以次名出線留在卡迪夫比賽，故此今仗收起多名主力，最終爆冷同魚腩南非女足互交白卷，不過由於巴西於較遲開波嘅A組賽事不敵英國，令「瀛女」於8強遭遇巴西女足。日本今次可謂棋差一着。至於英國在70,584名觀眾面前以一比○擊敗巴西，打破92年前創下嘅全英女足最高入座紀錄，比起96年美國對中國保持嘅76,489人最高女足賽事入座紀錄亦僅差6,000人，氣氛一流。
瑞典和加拿大攜手進級
而與日本女足同處F組的瑞典女足，一度領先兩球之下，被加拿大女足完場前追平，但仍憑較佳得失球差，勇奪小組第一，「楓葉國」亦取得另一席最佳第三名，攜手出線，前者會對住G組次名法國女足，後者則面對東道主英國女足。