高比拜仁累澳洲飛魚萊絲衞冕失敗？呢位籃壇「溝女王」早前專程探澳洲泳隊班，期間更與「泳壇第一美女」萊絲交換禮物，氹到伊人眉飛色舞。即使昨晚要為「夢10」出戰，但「小飛俠」之前仍殺入倫敦奧運水上中心睇泳賽捧場，擺明想繼續討萊絲歡心。
之不過揚言會睇晒射箭、舉重、摔跤甚至跳水等項目嘅高比，就貫徹花弗作風，日前向記者透露最想撐英國單車索女彭迪爾頓場。未知萊絲是否因為呷醋，不滿高比話咁快「移情別戀」，昨晨於女子400米個人混合泳大跌Watt，僅以4分35秒49排第6衝線。