同老公吵大鑊 李娜輸波玩失蹤
中國網球一姐李娜，於奧運女單首圈以盤數一比二不敵「長腿姐姐」韓杜荷娃。有媒體透露，李娜喺賽前練習時與教練兼丈夫姜山鬧不和，期間姜山罕有地大聲斥責李娜網前動作欠佳，令李娜按捺不住，向姜山作出「反擊」。
龐偉「梗頸四」杜麗黑面
不過李娜練習擊球時，表現開始好轉，唔單止得到姜山讚賞，旁觀嘅球迷都拍手支持。但唯一不滿嘅人就係李娜自己，當訓練結束，李娜就收拾裝備即時離場，唔單止冇理會要求簽名嘅球迷，就連記者同佢打招呼都冇反應，面燶燶咁返入更衣室。記者向姜山訪問，結果只係換嚟「不要問我，無可奉告」。李娜情緒受到嚴重影響，難怪正式比賽打唔出水準，輸畀韓杜荷娃賽後又突然失蹤未有出席記者會，令記者白等一小時。李娜上次喺國際大賽輸波後冇出席記者會，已經係○六年多哈亞運會。
至於另一對體壇夫妻龐偉及杜麗，亦遇到不愉快事件。龐偉出戰男子10米氣手槍比賽，去到決賽階段有少少手緊，最終只得第四名，搞到在場替丈夫打氣嘅杜麗塊面黑過包公。