前中國男籃中鋒姚明雖然未能以球員身份出戰倫敦奧運，但佢仍然以另一個身份參與奧運盛事，就係擔任中央電視台評述員。不過姚明喺倫敦出現尷尬事情，由於佢太高所以每次都要彎身進入酒店廁所。酒店為留住姚明，不惜拆咗廁所門上天花，務求令姚明更容易進出廁所，認真巴閉。
姚明與郎平、李小鵬等作為中央電視台評述員早前已抵達倫敦，姚明去到邊都成為大家焦點，酒店見到呢位星級客人，當然唔敢怠慢要好好招待。不過，姚明入住呢間酒店，有啲建築設計就令佢住得非常唔舒服，所指就係廁所。
據報姚明所住嘅酒店，廁所門高度只有2米20，對身高達2米29嘅姚明嚟講，要「方便」實在有啲困難，姚明如果唔彎低腰根本入唔到廁所。不過，酒店為留住姚明呢位「大人物」，立即將廁所門上面幅牆全部拆爛，浴室頂嘅天花亦一併拆掉，等姚明可以舒舒服服，呢間酒店真係夠體貼。