王明娟紅甲抓金
奧運女子舉重48公斤級別金牌得主王明娟外剛內柔，呢位7歲就能挑起一擔水嘅女力士，不失女性喜歡扮靚嘅天性，塗上紅指甲出賽，領獎手持金牌，畫面又紅又金，非常搶鏡，似乎一早已覺得自己會贏，所以悉心打扮。比賽當晚，王明娟84歲婆婆趕到縣政府特別安排嘅場地，從大電視睇直播為明娟打氣，王明娟果然不負婆婆所望，成功奪金。
王明娟以抓舉91公斤、挺舉114公斤，總成績205公斤奪得中國代表團在倫奧第2面金牌，佢上台領獎時，被鏡頭捕捉到原來呢位女金剛「悉心打扮」，塗了鮮紅色指甲，對於一向形象樸素嘅中國運動員嚟講，王明娟今次可謂非常出位。
26歲的王明娟因傷錯過前兩屆奧運，自嘲老而彌堅：「我在台上舉的時候，也許台下有觀眾會驚叫，年紀這麼大都還在舉，真是個老奇葩。」王明娟出生於農民家庭，97年開始練舉重，目的只是想有飯食，在01年九運會以16歲之齡奪得48公斤級別冠軍，一年後更於世錦賽一舉獲得抓舉、挺舉及總成績三金兼破世界紀錄。但03年尾因為十字韌帶斷裂，令舉重生涯受重創，但她沒有放棄，終於一圓奧運金牌夢。
身在家鄉湖南江永懸瀟浦鎮桐岩村嘅親朋戚友熱烈慶祝，84歲婆婆趕到縣政府安排嘅直播場地為外孫女打氣，父母王成志及王梅玉希望女兒達成金牌夢後早日結婚。事實上今屆可能係王明娟最後一次征奧。
易思玲勝在唔識英文
另外，為中國奪今屆首金嘅女子十米氣步槍射手易思玲「成功秘訣」原來係唔識英文，佢話聽唔明裁判報成績，所以唔知道對手情況，因而未有壓力可以專心比賽。