早前歐國盃，主辦國波蘭、烏克蘭小組出局，英國亦雷聲大雨點小，預計奧運冇場易踢！A組英國男奧足於奧脫福迎戰塞內加爾男奧足，主隊實力、默契只屬二流，單箭頭史杜列治威力弱，後防甩漏又多，塞軍係硬嘢有得打，捧「讓球客勝」同細盤！
（有線61及201台周五凌晨3時直播）
英格蘭於本地有大量粉絲，今次奧運出英國隊，選埋英倫三島精英，未開賽前已令人有憧憬，希望佢哋憑主場之利威番鋪。但領隊皮雅斯犯眾憎，唔選碧咸令球隊飽受國內、外壓力，而球隊拉雜成軍默契曳，後防除米卡李察士外冇個靠得住，比拿美唔弗幫唔到史杜列治，令球隊文又唔得、武又唔得，早前對奪金熱門巴西男奧足就露晒餡，前中後三線都破綻處處，就算喺自己地頭出戰，都唔見得有乜着數。
塞內加爾今次未有選入丹巴巴亞同柏比斯施斯，反而重用一班外圍賽過關重臣，對球隊默契、士氣有百利而無一害。佢哋人腳多為外流球員，好似韋斯咸悍將迪亞美、里爾雙雄伊祖沙古爾及蘇亞尼等都見慣世面，今場可全身而退。分組賽剛開始大家未入局，預計會踢得較保守，細盤及「讓球客勝」係投注佳品。