奧運男足勁爆上畫

倫敦奧運男足星級戰將強勢登場！倫敦奧運仲未展開，男子足球搶閘開波，16國精英分成4組角逐，首輪8場分組賽會喺今晚踢晒。雖然英國冇召入巨星碧咸，但今屆賽事仍然星光燦爛，大熱門巴西擁有尼馬及侯克等超級球星，另一奪金要角西班牙則由三位歐國盃冠軍隊成員桑馬達、佐迪艾巴及查維馬天尼斯擔大旗，南美勁旅就有屈機射手蘇亞雷斯同卡雲尼壓陣，日本則有超級中場宇佐美貴史領軍，加埋威爾斯老將傑斯代表英國首次喺國際舞台處子登場，咁多星，你唔係唔睇啊？

鬼Sir︰巴西搶金有誠意

奧運足球台評述員「細鬼」張志德認為今屆男足錦標是巴西的囊中物：「今屆巴西隊無論人腳、熱身賽及備戰都相當積極，很早已經到英國進行實地練習，看得出相當有誠意。況且，陣中包括尼馬等年輕球員，極需要這大型舞台顯身價來讓自己受到歐洲大球會垂青，所以絕對會以十二成功力出戰。」