倫敦奧運開波喇！

F組：女版巴塞升呢世界盃冠軍 日本勢破加拿大

奧運女足F組賽事開波，日本女足首場會對加拿大女足，兩隊上屆奧運先後喺淘汰賽不敵金牌得主美國，事隔四年，日本已全面「升呢」，上年喺女子世盃以巴塞式短傳踢法打破歐美球隊壟斷局面，今屆幾近以原班人馬征戰奧運，矛頭直指金牌，今戰可先拔頭籌，捧主勝！（有線63及203台周四凌晨零時直播）

球后澤穗希仍孭飛

日本上年爆冷奪取女子世界盃冠軍，話就話爆冷，但絕非一時符碌，大軍喺淘汰賽先後擊敗德國及瑞典等勁旅，去到決賽鬥到互射十二碼戰勝女足霸主美國，奪冠過程「含金量」極高！日本女足本來已經好有鬥心，受到上年311大地震事件刺激，一眾「東洋魔女」喺世盃搏到癲，今次繼續抱住一百分鬥志出戰奧運，早被視為爭標要角。

要登上女足后座，單靠鬥志唔夠，日本女足喺教頭佐佐木則夫帶領下大踢巴塞式足球，德國及美國等勁旅贏在身體質素好，而且踢法機動，日本則以柔制剛，擅長控球在腳，並以短傳入滲，球員普遍波底好，令歐美球隊高大後衞防不勝防，成功殺出一條血路。球后澤穗希上屆世盃入五粒，成為神射手兼MVP，喺奧運仍屬靈魂人物。

加拿大冼佳亞單天保至尊

加拿大女足上屆奧運不敵美國八強止步，日本則喺四強畀美國踢走，四年過後，加拿大水平並無明顯提升，仍然倚重隊長姬絲甸冼佳亞，呢位球星代表國家隊185次入138球，級數甚高，不過，隊中其餘球員產量唔高，日軍必會全力緊盯姬絲甸冼佳亞，若然睇得掂呢位大家姐，加拿大惡唔出樣！

講埋賽制先，今屆奧運女足分三組，每組頭兩名及兩支最佳第三名可晉級八強。睇番F組形勢，日本、瑞典同加拿大呈三強鼎立之局，同組有隊不明物體南非，絕對唔易踢。日本鬥瑞典並無必勝把握，首戰對加拿大必以三分為目標，有質有鬥志，值得支持！

蘇豪

美女大戰法國唔輸花旗國

奧運女足G組爆發「美女大戰」，美國女足對法國女足，「花旗箭頭」雅歷絲摩根同「女施丹」妮絲比又好波又靚女，邊個有較佳發揮，對勝負極為關鍵。法國女足於上屆女子世界盃殺入四強，攻守平均唔係好蝦，受讓要「讓球客勝」！

（有線18台周四凌晨零時直播）

雅歷絲摩根「艷」鬥妮絲比

美國、法國目前世界排名分別係第一同第六，雙方上年女子世界盃齊齊殺入準決賽，最終美國贏法國三比一殺入決賽，法國就取得殿軍。美國係女足傳統勁旅，陣中蘇露、雲芭芝、娜賓露都極有卡士，而雅歷絲摩根又當起當紮，難怪係奪金熱門。

不過法國亦係當頭起球隊，球隊以歐聯冠軍里昂女足為班底，喺女子世盃已打出悅目攻擊足球，其中妮絲比傳送，處理死球俱佳，射手芬妮喺外圍賽轟入11球狀態大勇，球隊近八仗取得全勝，唔係嘢小。其實雙方均係出線大熱，今仗打和冇壞，而且首仗未入局好正路，故法國受讓好路。

麥馬拿仁

巴西夠炒喀麥隆 哥倫比亞北韓好細界

今晚其他四場女足，其中E組喀麥隆對巴西（有線61及高清201台周四凌晨1時45分直播），以及F組哥倫比亞對北韓（有線63及高清203台周四凌晨2時45分直播），都值得推介。

巴西女足實力強勁唔使多講，佢哋仍有女球王瑪達助陣，再次成為奪金熱門都好正常，首場分組賽只對女足水平偏低嘅喀麥隆，巴西隨時會大炒對手，大盤值得意。而哥倫比亞對北韓就捧細盤。雙方曾於2011年女子世界盃碰頭，當時打和○比○，大家戰術上未必會有會太大改變，打法謹慎之下利好細盤。