奧運足球賽聽日就會搶閘開打，今屆除咗男足夠晒星味外，女足亦因日本捧世界盃而受到關注！歌手裕美話晒都叫做半個日本人，見到班同鄉姊妹咁爭氣，決定喺開波前以「國寶價」買番幾件日本女足波衫，實行以「貼身」方式嚟撐起呢班「大和撫子」！
不過，裕美就話唔係度度都有日本女足嘅奧運波衫賣o架，皆因件衫同平時嘅國家隊波衫有啲唔同，最大分別就係件衫心口冇咗日本足協個徽章（因為佢哋係代表日本而唔係日本足協），而更重要嘅係件衫少咗好多商業元素（膊頭至手臂嘅三間冇咗），更更重要嘅係香港冇行貨代理，令到買奧運衫只得水貨，落場版仲盛惠2000蚊一件，絕對稱得上係「國寶價」！
雖然貴到咁，但裕美都要荷包大出血嚟支持吓班同鄉：「我聽過佢哋嘅故事好多都好感人，話喺班女仔贏世界盃之前，基本上喺日本冇乜人理。有啲球員為咗踢波夢想，幾辛苦都好都Keep住朝早返工夜晚練波，將自己嘅生活奉獻晒畀足球！日本嘅女性喺傳統上都係捱得苦、溫柔穩重兼有高尚美德，所謂嘅『大和撫子』就係咁解，而我當然有份啦！哈～～哈～～！」
講到最愛球星，裕美就話澤穗希係不二之選：「因為佢喺隊波入面係元老級人馬，仲好照顧啲新人，簡直係大姐大！而且今年仲係佢第四度出戰奧運，一定要為佢打氣！奸爸爹！」
圖、文：司徒子文 鳴謝：Kitroom Sports