牙買加「神級飛人」保特贏奧運金牌唔係獨沽一味「死練」，近日就抽時間入戲院潮睇《蝙蝠俠》，仲有大批保安護住相當駕勢！「閃電俠」保特「睇戲上電」，亦因為咁所以冇跟牙買加大隊去教堂，睇嚟佢都好大戲癮噃！
擁有多名「陸上最強」飛人嘅牙買加田徑隊，駐紮英國伯明翰大學作最後集訓，當地不但為京奧三金飛人保特建造塑像以示歡迎，更邀請佢到市內最正嘅Cineworld電影院欣賞《蝙蝠俠｜夜神起義》，京奧女子100米銀牌得主史禾特等都有入場睇戲，當然最受哄動依然係保特。
大批市民隔住預先擺好嘅鐵馬，想一睹保特風采，雖然早前佢因腳傷臨時退出鑽石聯賽摩納哥站，但尋日見佢心情唔錯，仲同傳媒大談狀態：「我嘅腳傷已無大礙，好期待奧運開幕，好想喺『倫敦碗』跑道上飛奔。」唔知係咪受美國槍擊慘案影響，今次保特睇戲，身邊有大批保安包圍，唔想呢位世界飛人有任何危險。
美國泳壇17歲新星富蘭克琳，一提到蝙蝠俠呢套新戲就感到哀傷，事關同呢部電影相關嘅科羅拉多電影院槍擊案，正正就喺佢家鄉發生，喺個人奧運「處女騷」前得到如此打擊，富蘭克琳傷心到要接受教練等心理輔導。「我非常、非常震驚，我嘅朋友會唔會出事呢？好難想像呢個我經常路過嘅戲院，發生如此悲劇，實在太殘忍！」富蘭克琳嘅居所，只離肇事現場10多分鐘車程。
正與菲比斯等喺法國中部進行集訓嘅富蘭克琳，但願化悲憤為動力：「我想喺奧運爭取佳績，將金牌帶回科羅拉多，為家鄉朋友找到一絲安慰。」