巴西男足為爭歷史首金意志堅，不惜搬離奧運村抵抗「性誘惑」！早前有運動員大爆以往奧運村非常淫亂，朝早比賽夜晚就開性派對；「森巴兵團」粒粒皆星，其中尼馬更成各國女選手「頭號獵物」，領隊文奴文尼斯為免班衰仔玩喪個心，故決定改住赫里福特酒店。
奧運選手一直形象正面，但早前好多過來人大爆淫亂真相，連美國女足門將蘇露，都話曾於奧運村帶過別國選手返房翻雲覆雨，就知喺呢度乜都有得玩，對年輕運動員產生極大誘惑。早前巴西男足曾到奧運村觀光，因為佢哋個個大名鼎鼎，好快就被各國運動員認出，其中以「未來球王」尼馬最受歡迎，買買吓奧運紀念品，都吸引大量「粉絲」埋身，其中更包括多名男運動員。日頭白白都咁猖狂，去到夜晚仲得了！
文帥有見及此，同國內足總商量後決定唔住奧運村，寧願到位於赫里福特嘅酒店，以避開呢處「煙花之地」。巴西男足將於阿仙奴酋長球場進行操練，於奧運期間專心一致衝金。文帥表示﹕「我哋喺英國係要完成歷史任務，而唔係嚟玩，專心備戰係最重要。巴西有奪金實力，但都唔可以輕視對手。」
奧運男足自1936年起，連續13屆由歐洲國家摘金，但自西班牙92年奪金後，近四屆先由兩支非洲隊稱霸，繼而阿根廷冧莊兩連冠，故巴西被捧成奪標大熱好合理。西班牙由佐迪艾巴、查維馬天尼斯同桑馬達領軍，當然係「歐洲希望」；而烏拉圭召入卡雲尼及蘇亞雷斯打箭頭，陣容亦好有睇頭。