美國女足中場主力娜賓露勇敢「出櫃」，坦白承認係同性戀者，並已經同澳洲女足國腳莎拉華殊拍拖三年。佢話體育界唔應該歧視同性戀者，並認為國內「同志」，都希望同性戀者能為國出征奧運。另外，門將蘇露最近於藥檢中呈陽性反應，原來係因服食月經前藥物造成。
於體育界，同性戀問題依然係禁忌，於同儕中對此意見不一，有啲認為唔應該公開同性性取向，但娜賓露就唔係咁睇，本月初接受美國雜誌訪問時選擇「出櫃」﹕「我係同性戀者，朋友都好清楚我嘅性取向，而於女子足球界，個個都知我同莎拉華殊正在交往。我同佢已經拍拖三年，我哋同所有情侶一樣，於聖誕節我會帶佢返屋企，同家人共度佳節。」
今次「出櫃」，佢希望可以為「同志」出一分力﹕「現時體育界仍然恐懼『同志』，好多人都唔願意公開性取向。其實我覺得大家都好期待『同志』企出來，亦都想『同志』代表美國出戰奧運。」
另外，美國正選門將蘇露早前過唔到藥檢，原來只係一場誤會。事關其月經前藥物含有小量禁藥成分，蘇露於不知情下食咗，其解釋得到接納，無礙佢出戰奧運。