妮絲比喺法國女子足壇地位有幾高？就好似施丹於「雄雞兵團」中咁高！妮絲比細細個，就有「女施丹」綽號，除因為佢踢法同施丹一樣咁優雅外，仲因為同樣有阿爾及利亞血統。喺06年二人於訓練場中巧遇，施丹仲專登搵佢交換波衫添。
妮絲比於里昂入面踢攻擊中場，佢左右腳都咁熟，左右開弓周時入波。於國家隊佢就踢翼鋒，無論傳射都咁有水準。因為血統以及同於馬賽出生關係，妮絲比早早就被封為「女施丹」。妮絲比好謙虛︰「你哋咁叫我我好開心，但其實呢個世界冇人可以比得上施丹，因為佢係獨一無二嘅。」
2006年法國國家隊正備戰德國世界盃，男女子隊於訓練場相遇，原來施丹早已聽過「女施丹」大名，於記者拉攏下二人第一次見面，簡直係惺惺相惜，施丹仲主動同佢交換波衫。依家嗰件球王戰衣，就成為妮絲比爸爸嘅珍藏。