全球最好波嘅女人，可能係巴西瑪達；但世界最靚女球星，一定係法國國腳妮絲比。呢名25歲美人，一副精緻五官加條金色馬尾已經夠正，仲化晒妝上行gel甲落場，一舉手、一投足都咁吸引，係正宗「球場發電機」！妮絲比仲有個靚朵叫「女施丹」，肯定係本屆奧運女足「冧把溫」idol！
文：吳浩然
猶記得去年女子世界盃，開頭冇乜人睇，但賽事愈睇愈正，其中法國中場個14號女，簡直令全球男球迷驚艷。妮絲比身高1米68身材勻稱，一副美人胚子好得人鍾意。但千祁唔好以為佢得個靚字，呢粒濕水欖核踢法大路，以優雅踢法串連中前場，而且係死球專家，球隊所有角球、罰球都由佢一手包辦。
法國分組賽第一場一球小勝尼日利亞，妮絲比就當選「最佳球員」。喺佢英明領導下，「法蘭西女兵團」歷史性殺入四強，更得到今屆「倫奧」入場券，將同美國、哥倫比亞同北韓同組。雖然對手隊隊硬嘢，但妮絲比大熟大勇，要出線難度應該唔大。
妮絲比自細就鍾意踢波，一直都係同男仔過招，根本就唔知原來有女仔同佢一樣鍾意踢波。到佢13歲加入馬賽青年隊，之後就平步青雲，特別係07年轉投里昂女子隊後，除連擸五屆法甲冠軍外，仲攞埋近兩屆女子歐聯錦標，妮絲比有幾勁，唔使再多講。
妮絲比好波之餘，仲搭埋個靚樣，對男球迷嚟講當然係雙重享受。喺舊年女子世界盃驚鴻一瞥後，唔少宅男即刻上網google，睇吓佢平時嘅靚相，兼八吓佢有冇男朋友添。喺facebook入面，有幾個妮絲比嘅fan page，夾埋都有接近6萬fans，人氣真係好高！
小檔案
出生日期：23/1/1987
出生地：法國馬賽
身高：1米68
位置：中場
現効力球隊：里昂女足
球衣號碼：10
國家隊次數/入球：78/16
個人成就：入選2011女子世界盃明星隊