ＮＢＡ殺入總決賽大直路，本欄亦「玩玩」新意思由籃球達人邱益忠與記者Chit Chat交流一下。
記：睇完第一場，邱兄你覺得邊隊會贏到總冠軍？
邱：「熱火」啦，六場搞掂！
記：你唔係唔Like熱火咩？
邱：雖然雷霆打低三支前總冠軍，但季後賽係講格食格，雷霆究竟有冇人Mark到勒邦占士先！當一個人可出神入化用打欖球嘅形式套落籃球場，用強勁嘅身體將人撞開，然後３分線退後一步好似擲鉛球咁射嘅時候，真係要講聲「出事啦」！
記：我Feel到你曲線插緊熱火……
邱：有咩？如果聯盟有「最佳前三節ＭＶＰ」，勒邦占士贏硬，佢賽前47.5分鐘係威係勢，去到關鍵時候就化身隱形俠。
亂用３分戰術得啖笑
記：不惑，邱兄你究竟係咪撐熱火呢？
邱：我好顯然係「撐」熱火……成功再次奪得總亞軍啦，哈哈～
記：ＫＤ（杜蘭特）擔當第四節得分重點，心理質素好好～
邱：熱火都冇人阻擋到ＫＤ，所以雷霆可以話有驚無險地勝出。而熱火重犯上年總決賽嘅問題，無論領先或落後，都選擇「扔」３分球，如果真係堅持用３分戰術，點解唔畀米克米拿或柏堤亞機會？
記：可能係怕孭鑊啩！
邱：係呀，你講中重點了。但籃球係團體活動，做隊長係要承擔更多責任，但唔係咩都搶晒去做。好似一間公司嘅老闆，唔通佢要負責掃埋地？熱火教練可以安排占士同韋迪去衝擊籃框去博Foul In，而唔係搶綠葉工作！
邱益忠