陳慧琪老貓情緣
「家有一老、如有一寶」，所講的是香港滑浪風帆名將陳慧琪（Vicky）家中的白色家貓「貓貓」，這隻家貓與慧琪一起成長近十六、七年，從兒時的玩伴到少女年代的傾訴對象，「貓貓」在慧琪生命中飾演着重要的角色，雖然兩年前已嫁為人妻，但Vicky對於這位「老友記」仍然如珠如寶，她直言：「養佢一日就要照顧佢一生一世！」
傾訴對象相伴十數載
相對人類年齡已屬「人瑞」級的「貓貓」，陪Vicky由細玩到大，雖然牠是貓女，但年幼時相當活躍，現在就最喜歡食和瞓，跳躍能力大不如前，Vicky說：「牠以前可以跳上我張上格床，我哋一齊瞓，感情都算幾好，以前有啲乜嘢開心或者唔開心嘅事，我都會同佢講，佢會眼定定望住，好似真係知我講緊乜。不過依家佢真係老咗好多，最多只係夠力跳上琴櫈。」
儘管已經成為「何師奶」，又常常出外訓練及比賽，但Vicky不時都會返娘家探「貓貓」：「一方面返阿媽度食飯，另一方面就係睇吓佢。」Vicky形容與「貓貓」性格很相似，大家很有共通點：「佢好有性格，唔係個個叫都啋，佢好怕凍，咁啱我都係喎！」
不過，早兩年「貓貓」曾令慧琪嚇到三魂唔見七魄：「大概兩年前，有一天妹妹發現佢行路拐吓拐吓，爸媽剛又出外旅遊，立即Call我睇吓佢。只見佢行路怪怪哋，又唔食、又憂鬱，我即刻帶佢睇醫生，結果驗出佢盤骨移位，不能排便，醫生要佢留院兼吊鹽水。好在第二日佢返到屋企已經正常番，但自此之後佢嘅彈跳力已大減。」
最怕生離死別的感覺
「因為愛、所以怕！」慧琪過去為寵物多次流淚，因為經歷過很多次生離死別，她稱：「貓、狗、雀、兔我都養過，但我依家好有恐懼感，好驚嗰種生離死別嘅感覺，我試過因為搬屋送走了心愛嘅班點狗，又試過將被車傷嘅唐狗送去人道毀滅.....」慧琪覺得飼養寵物是「一生一世」的責任，亦要投放很多感情，因此她呼籲年輕人別貪一時好玩，誤了小動物一生。
主人威威
陳慧琪
年齡：31歲
運動主項：滑浪風帆
戰績：04世界大學生錦標賽金牌
06及10亞運會銀牌
08北京奧運會第9名
圖／文：李芷韻、Kin