大家姐自白書 將快樂帶畀更多人
大家好，我係大家姐Barbie，等我介紹下我哋3姊弟喇！我哋喺同一日出世，不過聽主人講出世過程驚險萬分，差啲有生命危險，好彩最後都平安度過。
我哋感情好好，食飯、瞓覺一定喺埋一齊，兩個細佬就百厭啲，成日周圍走冇時停，點似我成個淑女咁坐定定喺度。不過，佢哋一出差做動物醫生就變得好乖，氹到身邊啲人好Happy，其實我哋都有一個心願，希望將快樂帶畀更多人。
性格溫馴最緊要
可能大家對動物醫生唔係太認識，其實呢個係香港政府註冊團體，致力推動動物醫療計劃，為病人同有需要嘅人帶來生理和心理嘅健康療效，同時亦會教育市民愛護我哋啲動物，尊重生命。
動物醫生經常會主動聯絡本地唔同機構，好似醫院、護養院、孤兒院、學校等，提供義務動物治療服務，亦會為單親家庭、獨居長者等「送暖」。各位動物朋友想成為我哋一分子，條件好簡單，性格溫馴同身體健康，只要通過考核，就OKo架啦！