今屆歐聯冠軍誰屬，由新一代「估波神獸」尼古拉斯話你知！呢隻英國八歲羊駝繼早前成功貼中車路士奪得足總盃冠軍之後，再追捧車仔可以擊敗拜仁慕尼黑，首奪歐聯冠軍。尼古拉斯近期「羊」氣急升，更計劃預測英格蘭下月歐國盃賽果，接替德國「神算八爪魚」保羅，為廣大球迷指點迷津。
尼古拉斯生活喺英國一個農場，女主人蓮達月初英格蘭足總盃決賽前夕，請尼古拉斯估賽果，擺一個代表車仔嘅藍波，以及一個代表利物浦嘅紅波畀佢揀，結果佢用鼻觸碰選擇藍波，冠軍最終果然屬於車路士。蓮達趁勢再請「尼仔」預測歐聯決賽，今次紅波改為代表拜仁，「尼仔」照揀藍波車仔。
可能有人會懷疑尼古拉斯純粹對藍色情有獨鍾，但蓮達力撐佢係「識波之羊」：「尼古拉斯係忠實球迷，經常用鼻盤球，農場另外七隻羊並冇呢種行為。」蓮達大讚尼古拉斯比八爪魚保羅更聰明，要佢預測英格蘭出戰下月歐國盃賽果，捧佢做新一代「估波神獸」。
另外，有消息話一批德國新納粹主義背景嘅拜仁球迷，計劃襲擊到慕尼黑睇波嘅車路士球迷，預料有三萬名「車迷」飛赴打氣，好多人並冇門票，隨時喺市內同新納粹分子短兵相接，德英兩國警方已密切監察足球流氓動向。
不過拜仁會長漢尼斯煽風點火，指車仔班主阿布拉莫域係「石油黑手黨」，犧牲公眾利益，抬高油價謀取爆利收購球星，隨時進一步激發雙方球迷敵對情緒，德國傳媒指如果拜仁奪得歐聯冠軍，可進帳6,000萬歐元（約6億港元），打破球會3.5億歐元總收入紀錄。