季後賽第2圈最受矚目嘅對決，相信非湖人對雷霆莫屬。一支係歷史輝煌、奪得16次總冠軍嘅前度王者，一支係擁有多位年輕明星嘅冠軍衝擊者，特別係當「世界和平」阿堤斯喺常規賽批肘打暈占士夏登時，就預先辣着咗火頭。
筆者係湖人嘅超級粉絲，但依家佢哋已經落後兩場，真係唔多睇好湖人可以過到雷霆呢關。首先係前年湖人第1圈對住只係第8種子嘅雷霆，靠加素第6場最後0.5秒嘅補籃，先至勉強淘汰對手；第2點係湖人竟然要打足7場先搞掂打法單一嘅金塊，單係體力方面已經虛耗不少。
最後係如果話天才同白癡真係只差一線嘅話，咁拜林絕對就係最佳代表。佢可以一場波10次封走對手射波，亦可以無故企埋一邊唔聽教練指導（雖然個教練都係幾廢）。最弊就係拜林對住大隻佬，佢就即刻「縮縮北行鳥」上身，縮吓縮吓縮去加素後邊，但係人都知道加素一向持久力不足o架啦！
雷霆喺上年西岸決賽第4場一度領先小牛15分，但最後反輸，令佢地明白點樣打逆境波，今年首圈第1場對小牛同次圈第2場對湖人就足以證明呢隊波已經準備登基。至於湖人能唔能夠反勝，關鍵在於高比拜仁合理地出手、加素同拜林能否「硬起來」。
邱益忠