「什麼叫絕望，抬起眼望望」，如果用呢句歌詞嚟形容一支球隊，我會揀山貓。
「籃球之神」米高佐敦球員時代威震全球，豪取六屆總冠軍指環，場外球鞋又大賣賺到笑，可謂前無古人、後無來者。不過自從佢做山貓老闆後，就慘成球迷笑柄。
最近連輸21場嘅山貓係今季唯一一隊贏波場數未超過雙位數（7勝57負），更被人認為以呢個陣容同NCAA球隊比賽，都有可能戰敗而回。順便出個IQ題畀各位讀者，你講唔講得出山貓五個正選球員名字？
巴克利就踢爆當年曾建議佐敦選萊爾，但佐敦話整個團隊都認為阿當摩利臣會係球隊救星。巴克利認為，佐敦性格太過強勢，身邊手下全部變晒Yes Man，根本唔敢畀意見。
一個老闆需要有手下幫佢分析每一個選擇嘅潛在效益同風險，而唔係盲目附和。佐敦應該搵一個擅長選秀同交易嘅管理人員幫佢分擔，因為筆者真係唔敢吹捧佢嘅選秀眼光。
唯一好消息係如果佐敦願意賣盤，應該有一定買家有興趣。因為山貓下季預計會有兩千萬美元以上的薪資空間，亦有4份1機會抽到狀元籤。不過佐敦咁好勝，除非山窮水盡，否則山貓有排對住總冠軍得個眼望望。