破產後銷聲匿迹嘅前重量級拳王泰臣，終於東山再起；不過四十五歲嘅佢並非復出打拳，而係轉行做棟篤笑！一支公演足兩小時，講述自己傳奇嘅人生，拳賽、強姦、召妓事迹，讀書唔多嘅佢爆粗難免，開場白夾雜「What the hell」，但勝在夠傳神，觀眾有feel！
試想吓泰臣化身黃子華，原來好搞笑：「你哋入場，係咪想睇我喺舞台個衰樣呢？講真，我自己都想睇呀！」泰臣棟篤笑幕幕精彩，先講拳賽，當年喺東京火併拳王杜格拉斯：「嗰鑊自己衰鹹濕，賽前仲去召妓。」至於咬甩拳王荷里菲特耳仔，泰臣就話：「係佢將個頭伸埋嚟之嘛！」
泰臣當年因強姦罪入獄，藉今次棟篤笑大呼冤枉，真係好有黃子華feel：「我成世人做過好多衰嘢都冇事，偏偏嗰劑冇做到就要坐監，你話呢個係乜嘢世界？」
呢齣棟篤笑《舞台直擊泰臣：無可爭議的真理》由佢第三任妻子琪琪做編劇，喺拉斯維加斯公演，連演六日，票價117美元（約912港元），就算與魔術師大衞高柏飛嘅表演撞期，但頭幾場依然爆滿，反應唔錯o架。