《紐約每日新聞報》早前踢爆，紐約人為免影響季後賽門票銷路，等到門票限期過後先公布林書豪因半月板撕裂「收咧」消息。假設事件屬實，筆者有以下睇法：
1.無論安東尼願意與否，豪哥已經成為紐約人嘅鎮店之寶。
2.豪哥商業價值已遠超球場價值。
3.紐約人無品程度同某啲上市公司有得揮，利用財技去整靚盤數，然後誇大業績誤導股民（紐約人利用延遲公布消息避免營業收入大減）。
紐約人用陰招去呃忠實粉絲落疊，未免太低招。當年前紐約人之子馬貝利打波途中老竇突然心臟病發逝世，教練湯馬斯為免球隊輸波，竟然無即時通知馬貝利。
兩件事反映紐約拜金又功利且冷酷無情嘅社會特性，為咗盈利、為咗勝利，紐約人上至管理層，下至教練，為達目標手段盡出。
但正正係呢個功利城市，畀豪哥一個上位機會同賺到第一桶金（400萬美元廣告收入足以成為NBA十大場外吸金球員）。然而，若果係因為商機令豪哥繼續得到正選保證，其實佢條路會同姚明一樣，不斷被傳媒吹捧可以攞到總冠軍，但結果只係在第一第二輪徘徊嘅明星球員。不過，又邊個話攞到總冠軍先至叫做成功？
希望豪哥盡快康復，用實力證明自己係真材實料！
台灣《美國職籃》專欄作家邱益忠，自初中起不自禁地戀上NBA，對每支球隊有著獨特見解，以風趣幽默形式同你論盡NBA！
邱益忠