木狼隊主力路夫最近嘅名聲趨向兩極化，撐佢嘅認為佢係今季MVP大熱；插佢嘅就認為佢只係數據水分王，究竟點解？睇吓以下嘅數據分析就一清二楚嘞！
認為路夫係MVP嘅原因有：1.場均26.3分同13.8個籃板，分別排喺列聯盟第4同第2位；2.場均4進攻籃板；3.場均攻入1.8球3分波，命中率37.8%；4.木狼由上季榜尾嘅17勝65負進步至今季24勝26負，得勝率由20.7%狂升至48%。
至於認為路夫係數據水分王原因就包括：1.木狼場均44.6籃板排聯盟第3，而43.6%命中率排24，反映木狼隊籃板數據強嘅原因係入波命中率低，導致籃板數目增加；2.一個大前鋒5次出手會否過多？且命中率差過上季嘅41.7%；3.球隊仍未能殺入西岸8強，而且自從列比奧受傷後，球隊14場輸咗8場，勝率42.9%。
上述數據各有道理，好難有定論，但筆者認為，路夫正在默默地起革命，未來大前鋒除咗要拼搶籃板、禁區肉搏、穩定中距離，甚至有直迫射手嘅3分能力，簡單嚟講，路夫依家係魯域斯基加洛文嘅混合體。唔好以一季表現去評論佢嘅成敗，當佢同列比奧默契養成後，我敢話佢會將木狼升呢，將成為雷霆奪冠嘅攔路虎！
邱益忠