波格特鋪定退休路
【本報綜合報道】因左腳足踝骨折提早收咧，今季不能為新東家勇士披甲的澳洲中鋒波格特，決定未雨綢繆，為短暫的球員生涯鋪定後路，於家鄉墨爾本開設籃球基地，實行開班授徒自製「鐵飯碗」，兼且仲撈埋經理人公司，27歲仔已經咁識打算，真係抵讚！
撈過界做星級經理人
作為05年NBA新秀狀元，波格特原本係大好前途，奈何不斷嘅傷患令佢一直未能躋身頂級球星行列。波格特去年11月於家鄉墨爾本開設波格特籃球基地，計劃為退役後作好打算，而設備完善嘅籃球基地已開始招生。「波老闆」為吸客更加親力親為，將受傷前拍攝嘅宣傳短片掟上網，並靠人脈託一眾美國傳媒幫手宣傳，勁有生意頭腦。
此外，波格特亦於停擺期間撈過界，入股經理人卡達嘅One Management Group，目前手執馬刺新兵米斯、WNBA球星羅倫積遜、投球猛將夏倫及棒球手莫恩等澳洲客仔，躋身星級經理人行列。波格特場外撈到風生水起，不過其所屬球隊勇士就繼續不滯，昨日以87比90向拓荒者稱臣。