歐洲球會釋出球員參加歐洲國家盃賽事，將會獲得歐洲足協金錢補償，而總額高達一億歐元（約十億港元）。其實喺2008年歐國盃，歐洲足協都有類似賠償，惟金額比今屆少一半。歐洲球會組織（ECA）經常批評，頻繁國際賽事令商業球隊蒙受損失，尤其球員喺國際賽中受傷更嚴重影響到球隊運作。今次歐洲足協肯進一步擴大賠償金額，Daniel認為絕對係好事，起碼可減少球會批評聲音，有助改善雙方關係。至於歐洲球會組織主席路明尼加及歐洲足協話事人柏天尼，對於雙方能達成共識感到高興，協定書於土耳其簽署。