倫敦奧運仲有四個月揭幕，主辦國英國尋日高姿態宣布今屆各支運動隊伍的運動服，更搵來多位英國奧運及殘奧代表親身做Model，Daniel梗係冇錯過啦。不過呢批由著名時裝設計師Stella McCartney設計嘅英軍制服惹來劣評如潮，網民「罵」聲四起，要求重新design，令主辦當局「瘀到爆」！
Stella McCartney係披頭四成員保羅麥卡尼女兒，也是當今紅爆潮壇嘅著名設計師，但佢花兩年時間設計及研製嘅英國奧運服裝卻被大潑冷水，大會透過facebook發放新戰衣消息，即被大批網民抨擊：「這是徹底的失敗，根本就不是我們的國旗顏色。」、「要多一點紅色！請快快轉設計！」、「Oh親愛的Stella！你是否忘記了問問英國人的想法呀？」
事實上，整套設計都相當「肉酸」，有人批評足球服似超人，網球衣亦「娘爆」，全無英國特色之餘，大部分戰袍上的英國旗tune到只有藍色。Stella McCartney則強調其設計完全包含了英國國旗及奧運項目的元素：「我的設計首要元素就是以國旗為基本，我覺得有很多紅色在設計上，只不是過往傳統的演繹，設計更顯現代化。」Daniel認為，design呢家嘢真係各花入各眼，Stella又唔使咁介懷嘅。