華路雲去欖球場Happy Hour
四肢發達絕不等如頭腦簡單。「國泰航空/滙豐香港國際七人欖球賽」本周五拉開戰幔，尋日講完女仔，今日我哋睇吓香港男子隊。呢班大隻佬比賽時勁力十足，卸下戰衣後一樣瓣數多多。首次以隊長身份出戰今次比賽嘅華路雲（Rowan Varty），本身係見習律師，平時西裝筆挺，但離開「一號皇庭」後唔去Happy Hour，而係去打欖球呀！
實力唔差過職業球員
儘管係隊中最資深隊員，爸爸係英國人、媽媽係澳門人嘅華路雲近日先滿26歲。由於自小已開始做觀眾，Rowan笑言今次已係佢第20幾次參與「七欖」。如今不止成為場中主角，更榮升港隊隊長，坦言夢想成真嘅Rowan最想以行動證明，香港欖球隊並非「鬼佬隊伍」：「以前好多人都會話欖球係『鬼佬運動』，其實如我、基夫、A.希恩斯等都喺香港長大，能夠代表香港，我哋同姚錦成等華將都感到一樣激動同驕傲！」
喺港隊司職翼鋒或殿鋒嘅Rowan，2010-2011年度球季曾征戰日本聯賽，係Toyota Shokki Shuttles隊中一員。出國開過眼界，但Rowan並不認為港隊比其他隊伍遜色：「好多人以為日本多全職球員，一定比香港優勝。其實以香港隊而言，我哋嘅資源同訓練等都係一流。我哋只要打好啲，相信同日本聯賽隊伍一樣有得鬥。港隊要相信自己，我哋會做得到。」
當隊長近一年，華路雲領軍出戰不同地方賽事，雖然夢想成真，但佢話未算圓滿，仲有好多大賽想打。今次賽事港隊會先角逐外圍賽，喺分組賽與中國、東加，以及烏拉圭爭出線，如能殺入外圍賽頭三，就可爭得出戰巡迴賽資格。為了夢想，相信華路雲絕不手軟！
華路雲Rowan Varty
出生日期：1986年3月20日
身高/體重：1米73/81公斤
球會： DeA欖球會
位置：翼鋒/殿鋒
圖／文：曾詩敏、洪家健