丁加奴玩嘢傑志罷操！
Daniel個記者老友Vincent，最近去咗馬來西亞採訪傑志作客對丁加奴場亞洲足協盃，日前已經話傑志嘅「金眉教頭」甘巴爾投訴主隊畀個爛場佢哋練啦，點知尋日仲冇乜改善，搞到甘巴爾嬲到「罷操」，聽日對丁加奴要打天才波。
話說甘巴爾詐型後，主隊係改咗個場畀傑志練呀，但竟然係人造草場，而且場地職員唔畀球員着短釘波砵，咁練鬼練馬咩，甘巴爾一怒之下，就拉隊離場。咁樣一嚟，傑志聽日賽前，就得今日一課喺比賽場地作適應性操練啫。
羅志焜梁子成牛一
雖然係咁，傑志近排亦喜事重重嘅，繼射手佐迪初為人父後，羅志焜同梁子成亦一齊度過31及30歲生日，希望佢哋可帶旺傑志，喺聽日嘅亞協盃贏波啦。