Mika天分高上腳快

自從「球」愛敢死隊出街之後，我哋收到來自四方八面嘅女士「衣貓」，大部分都話想加入敢死隊行列學吓踢足球。佢哋話對足球有更多了解，可以同男仔有多啲話題喎！咁又係，依家香港地女多男少，做女仔梗係要自我增值，擴大市場佔有率，今次上來玩波嘅就係新進模特兒、許穎嘅同門Mika蕭美卡。

講起Mika，相信好多人都對佢有一定認識，事關佢近一年半載已成為報章雜誌嘅「常客」，但論到最爆嗰次就一定係幕前音樂演出。靚女Mika早前就同「廟街王子」尹光及Rap佬KZ，為單曲《Mr.One》拍咗輯ＭＶ，而攞命場口出現喺ＭＶ嘅尾段，當時Mika扮演茶餐廳侍應，咬住牙籤拎住碗麵上枱時，不慎跌咗支牙籤落碗麵度，當時尹光及KZ怒目而視Mika，以為會同侍應吵大鑊，點知Mika若無其事咁，徒手伸落個碗度，喺麵堆中挖番支牙籤上嚟再「擔過」。

放大圖片	度士教Mika	放大圖片

客串尹光ＭＶ竄紅

講真，如果Mika冇番咁上下演戲天分，點會做得咁自然。得到Mika之助，ＭＶ喺視頻網播出短短四日，點擊率已超過十四萬人次。

做得許穎嘅師妹，Mika當然亦係樣靚身材正啦！今次我哋就專程去到香港車路士足球學校，搵大師傅山度士過番兩招畀Mika。經過山Sir悉心指導，靚女Mika好快就上手，吖！唔係，係上腳至啱！山Sir仲讚Mika好有天分，叫佢以後多啲上嚟操波噃。

鳴謝：香港車路士足球學校

圖／文：司徒子文、巨高