兩隊今季季初表現神勇，分別排西岸第2、3位，不過講到話題性，當然係快艇搶晒風頭啦，因為「入樽王」格芬近期多次強力入樽，都成為YouTube嘅熱播片段，人氣直逼兩大球王勒邦占士同埋高比拜仁，今場肯定成為球迷焦點。
其實，快艇今季獲明星控衞基斯保羅加盟後，攻力確係大增，今季主場出戰12場贏咗10場，基斯保羅、格芬同比立斯都弗爆，3大主力上仗贏雷霆合共取得70分，射手比立斯嘅外圍投射近期着晒火，上仗對金塊射入6球3分波，係贏波頭號功臣，今仗隨時重施故技，反觀金塊最近狀態低沉，接連輸畀灰熊同埋快艇，睇怕今場都係惡唔出樣，再輸一場都好正路。