湖人斟亞連拿斯做救兵
在最新一期NBA官方實力排行榜僅列13位嘅湖人，昨日做番齣好戲，主場106比73大破山貓，以33分勝出今季最大勝仗，但仍未解決湖人今季低迷嘅問題。教練米克布朗賽後證實球隊正與「狂人」亞連拿斯接觸，希望搵呢位失業人士出山救亡，解決多年來積弱嘅控衞位置。
狂人無嘢撈 隨時可候命
尋尋覓覓，湖人近兩年始終搵唔到一個具級數嘅控衞去扶助高比拜仁，本來季前傾掂嘅CP3基斯保羅，又無奈被NBA總裁史端踩停，搞到今季只能沿用37歲走緊下坡嘅費沙擔正，但教練米克布朗透露佢哋正拉攏亞連拿斯加盟：「球會已同佢進行接洽，但我自己就冇同亞連拿斯傾過，除佢之外，球隊亦有同其他球員傾緊。」
亞連拿斯近季因藏械事件而搞到事業跌入谷底，到上季轉投魔術又不受重用，結果在去年12月被裁走，令「狂人」接近失業了兩個月。不過呢位曾3次入選明星賽嘅「狂人」始終具有卡士，職業生涯平均交出21.2分及5.4次助攻，如佢真係落實嚟到Staples Center幫手，相信可以減輕高比仔唔少負擔。加上「狂人」現年只不過係30歲，點計都當打過費沙。
想擸埋加特朗簡安馬田
除「狂人」外，有傳湖人亦希望羅致心儀已久嘅速龍控衞加特朗，主要因為呢位西班牙球員在國家隊與加素合作無間，相信會較易融入湖人體系。另外，《雅虎體育》亦報道，早前在中國CBA打波嘅「00年狀元」簡安馬田與新疆隊解約後，亦有意加盟湖人。
至於昨日場波，高比拜仁虎頭蛇尾，首兩節攻入24分，但下半場竟然捧蛋，幸好其他隊友幫到手，全隊有6人取得雙位數得分，其中拜林貢獻雙雙20分及11個籃板，助湖人大勝山貓33分，常規賽2連勝。
本報綜合報道