今屆NBA在停擺風波結束後已順利進行了一段時間，最開心非小弟莫屬，因為有幸得到《東方日報》邀請，今季開始為各位波友分享愚見。先同大家介紹自己，小弟自12歲開始中NBA毒，每日唔睇NBA資訊唔安樂，波衫藏量過百；不過球技方面就好屎！
講番正題，帶領雷霆取得12勝3負嘅杜蘭特，場均攻入26.5分，而「書包男」亦做出一個創舉，成為過去30年來首位在常規賽頭4場平均攻入30分，命中率超過50%嘅球員；另一代表作係季初對衞冕冠軍小牛射入絕殺3分波，令球迷見證新一代球王默默起革命。至於勒邦占士上季只差2場就可以拿到人生第一個NBA總冠軍，認真傷心。為咗拎冠軍，佢甘願放棄「大帝」身份，降格成為韋迪身邊嘅護衞，唔係人人都有呢種勇氣o架。
不過，當戴歷羅斯同杜蘭特今季先後射入絕殺之時，占士兩次將絕殺機會讓畀韋迪，唔通仍然未能解決關鍵時候腳軟嘅問題？其實占士真係要再肉緊啲嘞，並盡快趁呢兩、三年爭取第1個總冠軍，否則再老多兩年，就未必夠羅斯仔同杜蘭特爭。占士如果咁唔好彩退休前仲係無冕之王，可考慮去CBA或係台灣SBL發展，包佢攞冠軍攞到手軟！
台灣《美國職聯》專欄作家邱益忠，自初中起不自禁地戀上NBA，對每支球隊有著獨特見解，以風趣幽默形式同你論盡NBA﹗