兩代「超人」奧尼爾同杜域侯活都被罰球玩死，一名佛羅里達中部大學醫科女生洛碧姬，日前就出來「抽水」，話要同又名「魔獸」嘅杜域侯活打賭鬥射罰球，若然贏咗就要杜域侯活幫佢交學費，而輸咗就任由「魔獸」處置。據悉杜域侯活已經聯絡「罰球王」馬克派斯惡補，似乎要「教訓」一吓呢個後生女。
杜域侯活在上周五超越名宿張伯倫，創下單場常規賽射足39個罰球嘅創舉，殊不知「魔獸」只能尷尬地中21球，令今季罰球命中率下降至職業生涯新低45.9%，立即受到美國傳媒狠批，就連正喺佛羅里達中部大學修讀醫科嘅洛碧姬都睇小佢。
據《奧蘭多哨兵報》報道，洛碧姬前日拍片掟上YouTube撩杜域侯活鬥波，洛碧姬話：「賭注好簡單，如果我贏咗，D12（杜域侯活）就要幫我交學費，如果佢贏，我就任由佢處置！」縱然杜域侯活仍未就「挑機」事件作出回應，但昨日就有消息話「魔獸」會向魔術發展聯盟球隊教練馬克派斯拜師惡補罰球，後者昔日征戰NBA十二個賽季內，總共射入2,135個罰球，職業生涯命中率高達90.4%，睇嚟杜域侯活都幾介懷洛碧姬嘅打賭喎。
雖然罰球技術備受抨擊，但杜域侯活始終都係聯盟最佳中鋒，而且魔術狀態大勇，未計今朝對紐約人嘅賽果，魔術近三戰全勝，相信明早在主場迎戰弱旅山貓，都應該會大開殺戒，上盤值博。
（now 678周三早上8時直播）