索爆主持講男講女
球愛敢死隊出動！體育版「優質雄性動物」接受號召，組成一支史無前例兵團，走訪各界靚女，講吓佢哋對波的感受，當中有愛情、奇情、癡情……乜情都有，務求要你讀完之後愛到死為止！
明日澳網開鑼，敢死隊就搵嚟now觀星台主持楊柳青（Wiyona）助興。或者佢身形高挑體格強健，所以好多人都叫佢做大隻青。其實大隻青係一個專業Model，為保持美好身段，平時經常踩單車同打羽毛球，甚至打泰拳減byebye肉。咁鬼Sporty，梗係符合「球」愛敢死隊嘅要求啦！搵佢做澳網應援團Fit晒啦！
講女：支持行家撐寶娃
提起澳網，大隻青話佢係女人，就梗係會留意女單多啲，而女單競爭嘅激烈程度，絕對唔差過男單。問佢今屆睇好邊個，佢話係俄羅斯靚女舒拉寶娃，佢話「娃姐」贏過3項大滿貫，實力唔使懷疑。而且佢又經常客串做Model行天橋，所以梗要撐「行家」啦！至於「娃姐」成日受傷患困擾，大隻青話未驚過，可以用大賽經驗搭夠。男單方面，大隻青就捧祖高域場。但咪以為係鍾意佢靚仔喎，反而係佢成日扮嘢好鬼得意氹得佢好開心。
講男：讚扮嘢祖識冧女
話說早輪「扮嘢祖」喺球場扮女子網球手開波，而早前喺記者會笠個金色假髮扮舒拉寶娃，笑到大隻青肚痛咁滯。所以話男仔有幽默感有幾重要呢？成日戇居居好似碌木咁，財神見到你掉頭走啦！何況係靚女。
講番今輯拍攝過程都幾辛苦，主要喺打網球環節。大隻青嘅反手抽擊相當凌厲，大板殺埋嚟根本冇得救，巨高執波都執到氣咳。冇法啦！網球唔係巨高強項，日後惟有加倍練習，唔好輸畀女仔咁醜怪。
More About Wiyona
年齡：24歲
身高：168cm
簡介：now102觀星台主持，擔任模特兒5年，參與過平面廣告、電視廣告及時裝表演。本身對時裝及化妝好有心得，亦開設自家時裝店為客人扮靚靚。
文：巨高
攝：司徒子文