喪轟48分!高比久違飆分騷
今季備受抨擊嘅高比拜仁用行動證明寶刀未老，尋日面對鳳凰城太陽打出久違了嘅「飆分騷」，高比仔個人轟入賽季新高48分，同時亦成為首位球員在今季攻入「40+」，帶領湖人主場以99比83氣走鳳凰城太陽，常規賽3連勝。
事實上，年屆34歲嘅高比仔已好耐冇試過上演「飆分騷」，對上一次取得48分或以上，已經係09年3月嘅事。不過高比仔嘅得分戰績一向彪炳，連埋今次在內，職業生涯試過108次得分「40+」，28次攻入48分或以上，而單場得分紀錄就要數到06年1月對速龍嘅經典之役，當日「小飛俠」怒轟81分。
領湖人氣走鳳凰城
高比拜仁賽後表示：「作為一個排名第7嘅球員嚟講，今場表現算不錯吧！」高比仔所以咁講，全因《ESPN》在季前將佢實力排在第7名，所以高比仔即拿來嘲諷一番。此外高比亦透露，因為手腕痛楚賽前要打麻醉針比賽，往後賽事前好可能都要繼續打針，不禁令人擔憂佢嘅傷患。湖人今場贏在最後關頭打出一波16比1攻勢，成功搶得3連勝。
新夢幻隊名單「外洩」
另方面，有美國傳媒已率先爆出最新一支美國夢幻隊19人名單，其中8人包括勒邦占士、高比拜仁、韋迪及杜域侯活等均屬08年北京奧運奪金功臣。至於最後12人名單將會在六月公布，以出戰倫敦奧運。
新夢幻隊19人初步名單
前鋒：艾迪列治（拓荒者）、安東尼（紐約人）、杜蘭特（雷霆）、格芬（快艇）、伊古達拿（76人）、勒邦占士（熱火）、路夫（木狼）、奧當（小牛）
中鋒：杜域侯活（魔術）、保殊（熱火）、贊特拿（紐約人）
後衞：迪倫威廉士（籃網）、韋斯布克（雷霆）、韋迪（熱火）、戴歷羅斯（公牛）、高比拜仁（湖人）、艾歷哥頓（黃蜂）、基斯保羅、比立斯（快艇）
註：美國部分媒體披露，未經官方證實