奧巴馬勁Like魯域斯基

望明年接見愛隊公牛

傳統以來，美國總統都會喺白宮接見應屆NBA總冠軍，親自表揚佢哋嘅成就，然後球隊就會順道作客鬥巫師。不過，由於今季NBA受到停擺影響，所以小牛今趟係專程到華盛頓見總統，奧巴馬演講時都好識做話高興接見小牛，並且向班主古班大送高帽。

一向係籃球發燒友嘅奧巴馬讚揚小牛係一支特別嘅球隊，並非單靠個人質素去贏波，反而比賽時總會尋找到空位給隊友，打出團隊精神。而佢亦點名大讚上季總決賽MVP魯域斯基，在決賽時患病及手指受傷都堅持帶傷病上陣，呢份堅毅精神絕對值得人尊敬。不過奧巴馬席間就講笑指明年將會接見公牛，流露出佢希望愛隊能夠重奪冠軍嘅願望，擺明唔想小牛冧莊。

獲點名稱讚的魯域斯基向奧巴馬致送小牛23號球衣。（法新社圖片）

有齊小牛隊員簽名嘅「金籃球」分量十足。（美聯社圖片）

作客波士頓肯定惡打

小牛去完白宮之後就要連打兩場作客賽事，分別係今朝鬥活塞及明早對塞爾特人。「綠軍」上場意外地慘負溜馬，幾位巨頭如皮雅斯及謝美奧尼爾都失準，幸好佢哋賽後得到充分休息，足足隔5日先再鬥小牛，預計一班老兵養精蓄銳後，可以打出應有水準。

奧巴馬愛隊公牛（白衫）昨日贏活塞，戴歷羅斯一個扭幾個。（美聯社圖片）

放大圖片

反觀小牛比較忙碌，而且賽前傳出球隊有意買斷奧當嘅合約將佢裁走，全因呢位新兵表現唔合格。故小牛內部士氣只屬一般，而估計新加盟嘅易建聯亦冇咁快融入球隊，作客波士頓勢處下風，故呢場可以睇高主隊「綠軍」一線。（now 635周四早上9時直播）