火箭正選控衞路維惹官非，佢因為在去年停擺期參與一場業餘賽事時，涉襲擊及恐嚇一位女球證，被當局提出起訴，若然罪名成立嘅話，隨時要入獄半年。
事情發生於去年9月22日，路維在「賭城」拉斯維加斯參與了一場有NBA球員參加嘅業餘球賽，當時路維對女球證芬妮嘅判決表現得甚為不滿，到完場後竟然兩度怒將籃球掟向芬妮，之後仲行去佢身邊用粗口鬧人，並恐嚇會進一步襲擊佢。
由於當時有不少目擊者在場，當中包括其餘兩名球證願做證人，所以拉斯維加斯一家法院已向路維發出傳票，後者必須在2月2日前上庭。據悉一旦罪名成立，最高罰則將要入獄6個月及罰款1,000美元，而路維早前已經向芬妮公開道歉「補鑊」。