熱火雷霆長勝斷纜
【本報綜合報道】兩支開季5連勝嘅「風頭躉」熱火及雷霆昨日分途遇上挫敗，熱火在主場面對鷹隊，竟讓對手過氣老將「T-Mac」麥基迪在最後一節「為所欲為」，單節攻入13分，助鷹隊以100比92撲熄熱火；另邊廂雷霆則以87比100作客不敵回勇嘅小牛，令今季NBA再無不敗之師。
T-Mac再做贏波英雄
今季開咧表現穩定嘅鷹隊，作客挑戰「風頭躉」熱火毫無懼色，與對方鬥攻下，3節過後領先熱火4分。最後一節竟輪到今季先加盟嘅麥基迪Show time，呢位昔日得分王多次在熱火追貼分數嘅情況下，冷靜地回敬遠程跳投，其中包括3球關鍵3分波，結果「T-Mac」單在第4節已攻入13分，令熱火返魂乏術，成為贏波頭號功臣。
全場交出16分、7個籃板、4次助攻及1次搶截嘅麥基迪，賽後坦言好耐冇試過成為贏波英雄嘅滋味，又話呢種久違感覺好正！另一功臣就係「鷹王」祖莊遜，全場射入21分及搶得5籃板。熱火「大帝」勒邦占士今場亦交出華麗數據28分、7籃板及6助攻，可惜好拍檔韋迪唔爭氣，17次起手僅中4球得12分，成為輸波最大罪人。
魯域斯基手風順番
西岸戰線方面，衞冕冠軍小牛終於打番場爭氣波，幾位主力「德國槍」魯域斯基、馬利安及泰利等都打出水準下，以100比87殺敗雷霆，報回季初一敗之辱。魯域斯基今場手風順暢，16次起手中10球得26分，伊巴卡明顯睇唔住呢位上季總決賽MVP。雷霆5連勝告終，而小牛贏波後總成績則為2勝4負。