拜林復出即嚟料 湖人執「金」3連勝
【本報綜合報道】兩大猛將回歸命途迥異，昨日「放監」的拜林猶如猛虎出柙，新季首戰即貢獻29分及13個籃板，協助湖人喺大除夕以92:89勇挫金塊錄3連勝。反觀昔日在豐田球場呼風喚雨的麥基迪，昨日帶領鷹隊重遊舊地卻遭球迷勁噓，認真冇癮。
縱然獨取17分的高比拜仁命中率僅逾3成，加上湖人頭12次起手射3分全炒，慶幸開季坐完4場波監的拜林表現Sharp醒，昨晨18投13中之餘更助攻助守，成為湖人贏波最大功臣，難怪教練米克布朗賽後話要力捧「小鯊魚」做湖人第一攻擊點。
T-Mac倒戈火箭遭柴台
另一球星麥基迪昔日喺火箭後期傷多過打被指呃糧，昨重臨豐田球場時，每次掂波都被主場球迷狂噓，即使「T-Mac」攻入13分，打出加盟鷹隊以來代表作，惟最終仍難挽輸波厄運，以84：95不敵火箭。另邊廂馬刺主場104:89輕取爵士，為教練普波維治獻上任教生涯第800勝。